ازدواج الجنسية

الى الاخ ابوصافي الطرابلسي بخصوص ازدواج الجنسية

بعد التحية والسلام/

قرأت مقالتك التي نشرت قبل يومين والتي وضحت من خلالها أسباب رفضك لإخوتك الليبيين مزدوجي الجنسية من الترشح للانتخابات,لذا أحببت الرد علي مقالتك هذه ولكن بلهجتنا الليبية في محاولة يائسة مني لإزالة الضباب من أمامك والمتسبب في قصر النظر عندك.

قبل كل شئ, ماقالك حد قولنا شن جنسيت عايلتك..وميهمنايش نعرف أن عندك الجنسية الأمريكية انت وعايلتك ولا عندكم الصينية..رابي يسهلك لان هدا مش موضوعنا.

بالله تعالا ياخوي يابو صافي قولي كيف تعبقرت وعصرت راصك واستنتجت أن الليبي إلي عايش في ليبيا وطنيته ميه في الميه وخوه التاني إلي تمرمد البرا وطنيته مشكوك فيها..يعني معيار الوطنية عندك لليبي هو البصبور ... كان عنده خضوري بس معناه هدا أموره طيبة وكان عنده خضوري وزروقي ولا حموري معناها هدا مش وطني..حطه عالرف..

معليشي اهو بنوسع معاك بالي وخلينا نزيدوا انفصلوا وانخشوا في الغريق..قولي يااستاد من إلي شنق خوتنا الليبين في 7 ابريل في عز النهار؟ هل إلي شنقوا هما ليبين كانوا عايشين البرا إلي معندهمش وطنية ولا كانوا يسكنوا في ليبيا..

قولي يااستاد, مني الي نقزوا في حياش ودكاكين الليبيين المساكين إلي ماعندهمش واسطة " ياناري عين تشبح وعين تبكي " ؟ هل هادم القفزة كانوا من الليبيين إلي عايشيين في الخارج ولا كانوا من ليبين الداخل إلي كلهم وطنيين ميه في الميه....ومن إلي قتل خوتنا في حبس بوسليم بدم بارد لمجرد أنهم طالبوا بتحسين ظروفهم؟ هل كانو من الليبين الي عايشين البرا .

خليني نزيد نفكرك بنزاهة ووطنية بعض ليبين الداخل مع احترامي للأشراف...بالله قولي من هما إلي قصفوا مدننا وقرانا ماخلوا شي ماقصفوشي بالدبابات والصواريخ والمدافع وعد وتغلط لارحمة ولاشفقة..ماسلمش منهم لا الاطفال ولا النساوين ولا الشيوخ... حتي الحيوان أكرمكم الله والزرع ماسلمش منهم..أحرف من جو هولاكو...خليك من الاغتصابات والتعديب والتنكيل..والله هادوم ناس حتي تقتلهم مية مرة شوية فيهم...دارو شي الواحد مايعرفش حتي كيف يوصفه...بالله ياخوي ياصاحب العقل إلي باين عليه مش صافي "سامحني عليها هدي...خوك مفور من كلامك سامحني" قولي من دار هالجرائم هدي كلها....

زعميتك تنبه فينا علي أساس حني باكستان منفهموش وقايلنا شوفوا اهو شلوف والترهوني طلعوا في وحدة من الإذاعات ويفتخروا بجنسيتهم التانية..علي اساس موضوع جايبه...وكاينك بتقولنا كلهم إلي عايشين البرا زي بعضهم مش وطنيين... والله يااما انت قاعد تصتصغر في عقولنا ولا قاعد تصتصغر في عقولنا....

الليبيين إلي قاعد انت تحاول تهمشهم, سمحني نقولك مصمص بفمك بالزهر قبل ماتدوي عليهم وتشكك في وطنيتهم...هدم هما إلي كانوا ديما طالعين مظاهرات البرا ويحاولوا يوضحوا للعالم شن إلي صاير في ليبيا ويعطوهم فكرة صح علي غرندايز إلي كان يلعب فيها تسعات يهيج زي مايبي...هدوما خوتك إلي ماحبوش يبندرو للقيدا وميبوش ياكلوا رزق الحرام ويخوشوا للجان الثورية.. باكشي تحسابه كان مايقدروش يبندروا ويخنبوا زي ماداروا غيرهم.. خوتك هادم الي فضلوا ان يتغربوا علي ناسهم وصحابهم وبلادهم.. باكشي تحساب أول ماوصلوا للدول الي حضنتهم لانهم اصحاب قضية فرشولهم بساط عليه ورد.. هادم تمرمطو وتعدبوا ومعضمهم مروا بصعوبات مايعلم بها إلا ربي ولكن مع ذلك كانوا مش مقصرين في حق وطنهم..وينك يامضاهرات تلقاهم, في النت تلقاهم شادينها كتيبة مافيش بطالة...نسيت الي استشهدوا منهم في الجبهات....نسيت المساعدات الي كانوا يبعتوا فيها لخوتهم في الداخل عن طريق تونس..وهدا كله من باب الواجب وفي سبيل الله..

ومش هكي وبس أول ماصارت الثورة روحوا هلبه منهم وخشوا معضمهم عن طريق تونس..ولمعلوميتك ياخوي إن كتيبة طرابلس اسسوها الليبيين إلي عايشيين البرا إلي حضرتك مشكك في وطنيتهم..

هادوم الناس في منهم إلي ليه 40 سنة قاعد البرا وفيه الي ليه 35 سنة, فيه إلي متجوز من البلاد الي عايش فيها وفيه الي متجوز ليبية, فيه الي عنده صغار وفيه الي لا.. هدوم ميجيش تفرض عليهم يروحوا بعد ماعاشوا سنين الله البرا وتفرض عليهم يتخلوا علي جنسياتهم التانيه ويروحوا ويبدوا من السيفر... هدا كلام مايجيش منه وياخي ادا كان واحد منهم حب يترشح باش يفيد بلاده لفترة معينة بالعلم والخبرة إلي أنعمها الله عليه شن المشكلة..خيرك واجعك خاطرك...وبعدين ياسي الحاج ماقاليك حد صوتلهم...انت والي زيك ماتصوتلهمش وخلاص..لكن مش تحطهالي نص في القانون...اتقي الله ياخوي وياسر من جو الاقصاية جو القيدة الي قاعد تبيبيلاه.

كانك طالعلي فيها جو انك حريص علي البلاد وواحد, انقولك الليبين الاحرار كلهم خايفين علي بلادهم....ولازم تفهم ان الكتيبة المكتوبة علي البصبور عمره ماكان مقياس للوطنية...الي في القلب مايعلم به الا الله... لو انطبقوا مبدا الشفافية وكل مترشح نعرفوا عليه شن دار وشن مادارش وقداش عنده من تعووس في البنك ونديروا لجان متابعة للمترشحين..صدقني معاش تخاف من شي...ودوة هدا عنده بصبور واحد والتاني عنده زوز والله مش حتفرق.

بصراحة والله الا صدمتني بمقالتك هدي, كيف استاد جامعي يفكر بهالشكل السطحي, انشاالله مايبداش في منك هلبه كان هادا تشاو علي بلادنا.

وفقنا الله وهدانا لما فيه خير بلادنا وعاشت ليبيا حرة أبيه يسودها الآَمن والرخاء.

بقلم : رياض بلعيد