قول الشاعر

قول الشاعر نعيم الزوى هما هما !! نـفـس الـوجـوه اللـى اتـجيـب الغمه !! كــيـف أمــس كيـف الـيـوم !! هما همّا !! نـــفــس الــــــنـاس .. و نفـس الاسامى اللى اتجيب الياس كـــذب ونفـــــاق وظـلـم و اخــتــلاس .. ويــن مـا أيـبانــوا يـسـرقـوا المهمه عاشــــوا على قـــل الوفا واخــلاص تربــــــــوا على يده زعيم الامـــــه نـفــــس احـــــمــيده .. ونفس الوجـوه الـلـى زمـان زهـيده مـــا تـــقـــول جـدت فـى لـبلاد جديده .. ولا هناك عـيل مـات ضـحـى بـدمه ولا تــــقــول شـاب اليـوم فاقـد أيـدة .. و فــاقــد أقــدامـة و لــنـظار وفمّة نفس الحال ونفــس الرزالــه وطيحة المزال ونفس الفســـاد ونفس نهب المـال واللى روانه الســـم زايد سمـــه اليــوم ناس تسلـــق على لحبال على كل خوطه جامده ملتمه رد الشاعر صلاح عبيد من مدينة مصراته نـــفـــس الـــحـــوســـة .. و نـفـس الألحان و نـفـسهن بالدوسه لــيــن نـفـسـنـا تــمّت الاّ مــحـــبـوســـــة .. علي ناس بين الــنــاس هـــي منـذمّه علي أشكال خطوتها بقت مــــدروســــــة .. واضحين ، ياصاحب . أقـلال الهمّـه نــفــــس الــــقــصّــة .. و نــفـــس الحكاوي و نفـسـهـا بالبصّه كـم ألــف غـصّــة حاصـــلة فــي غـصـّة .. فـــــ أقـلـبــونا دارت هـــوايـــل جـمّه مـــــن ناس طالــت مــن وطـنـّا حــصــّة .. كــلـــــو حقـنـا و الـوطن زادوا هـمّة انـــــعيـــدو الثورة .. ثـــورة وراء ثـــــــــورة وراهـــا ثــورة أنـكــانــهــو بـقــى هــالظـلم يـلعب دورة . و بــقيــو الـلـــي مـن قبل باعوا الذمّة و ما يــوم تـبــقـــــى أبــلادنــا مكسورة .. أحـنا شــعــب مــتـماسك وفوق القمة رد الشاعر جبر الصبيحى نفس الدوه ونفس الوجوه اتريدنا بالقوه ونفس الفسس مازال هوا هوا عصابه كبيره وسطنا ملتمه نفس الظلم ونفس المطامع لوله والحلم جهال تحلف ماكساهم علم شاريين الشهايد بايعين الذمه

رد الشاعر عبدالمولى زيدان كيف فضيله !!! منها بـــري الفضــل راه رزيله كانــــت اتصفقله وكانت ديله الطّاغي امربيهم اقلال الدمّه عابي عليهم وين صار رحيله يقلوا هنانا ويصعــــدوا للقمه بيناتنــا زارع انفـــوس عليله وصاهم علينا ينشروا في سمه ما تقول عليه الوطن ماتوا عويله وماتوا تريس يكسروا في الصمه بلاها الكــــرامه مايباوتوا ليله .نالوا الشهادة شادين ابهمّه هذه الحكمة جـــت ف تنزيله مولاي بشــــرهم اخيار الامه وصادق صلاح اعبيد ف تفصيله ثورة بعـــــد ثورة اتزيح الغمه نفس الشيْ بلاواسطة ما ينفعكش الــــدّيْ كي قبل كيف اليوم يا خـــــوتيْ علينا الدّيابة صابحــــه ملتمّـــه وينه المخلــــص للبلاد وفـــــيْ تحت الوطــا فادي الوطن بدمّه مش كيف من تسلق عالحبال يجيْ يريد منصبه ومنصب يكون ال عمّه وخير شاعـــــرنا نعيم الــــزوىْ وين ما تكلم سكــــــروله فمّه نفس الكذب يديروا الحرام يحملوا عالنذب بندرلهم شيطان جذبوا جذب تلاقوا على الحوزات داروا لمّه هماهما ..نفس الوجوه اللى تجيب الغمّه ... كيف امس كيف اليوم

ورد من الشاعر على بورقيقة الزنتانى نفس الشلة**ونفس الوجوه الفاسدة المنحلة ونفس الدباير والفساد اكله**ونفس الضماير خاربين الذمة فيه من رقص وفيه من طبله**داسوا على قبر الشهيد ودمه ماهمهم كان الطمع في الغلة**وماهناك من هالوطن شايل همه *** نفس الدباير**ونفس العقيدة والظلام الجاير لاعاد حس ولا هناك ظماير**يا وطن منهم صايباتك غمه يا خيبتك يا وطن ف اللي ساير**مافارقك فكر العقيد وسمه هما هما ....نفس الوجوه اللى تجيب الغمه ... كيف امس كيف اليوم

ورد اخر من الشاعر الكبير (( محمد الممهور ))من مدينة طرابلس نفس الشلّه ..... اللي كان صاده م المخطط ولّى و مازال شاغل في البلاد محله ..... و عالقرش يرجف صايباته حمه و حتى انكانه غاب فكره خلى ..... التغيير غير الوجه و المسمى و لا مقصدي في انسان يخشى في الله ..... خدم ليبيا صادق و وافي ذمه عناي كل من فوق الكتوف تعلى ..... يبي يسود و يلبّس الناس العمه نفس السيره ..... نفس العقول الساذجه الصغيره ليا كان غاب فلان واجد غيره ..... انتاج عصر مالتجهيل شن بيتمه ؟ اللي هذا يجري طمع في توزيره ..... و وين ما فشل ضد الحكومه تما و اللي جاي مالخارج و قلنا خيره ..... بداها بتعيين اسرته و بن عمه ما تقول ناضت في البلاد ذخيره ..... لا ناس ماتت بالوطن مهتمه تجري على عهد الجهل تغييره ..... و ضد الفساد تريد شحذ الهمه نفس القصه ..... و هي المناظر نفسها و الغصه و كثر العرايك نال فينا حصه ..... اليوم كلها بقرون حتى الجمه و الشلكه بدت باعراسنا مختصه ..... بليجار تحيي كل فرح و لمه نفس اللاين ..... و نفس القلم و الفكر و الديزاين في كل شارع ناصبين كماين ..... شوق كرهبه وخذت مشت منغمه و كم من بري عدى بتهمة خاين ..... حساب تصفيه في الوطن فاتح فمه و ضربة اطبه في الجريح تعاين ..... اليوم عددها ماعاد تعرف كمّه و غنايم يبوا خير البلاد الباين ..... غزوا غزي موش بلاد هلها همّ لا يتبعوا الدوله الا بلساين ..... لا يسمعوا في نهي من لائمه طابور خامس م القديم الشاين ..... غاطسين في منقع جهل للجمه يبوا يشوّهوا ثورة شباباً زاين ..... فدا ليبيا هاين الروح و دمه و هانا تحررنا من اللي كاين ..... و شلنا اعلام النصر باهي و ( ثمّ ؟ ) نريدوا دوله ..... و حكومه براحة شعبها مشغوله و قدام برلمانها مسؤوله ..... الرئيس نقدر نشكره و نذمه يكون منتخب و معاه ننتخبوله ..... كم من وزير بناء الوطن يهمه و جهاز امن لمن الوطن ما هو غوله ..... يحافظ عليه بتربته و بيمه لا يسيب لا والي بظلم يطوله ..... قانون لا يعرف حمد لا عمه و جيش رايدينه للوطن نسعوله ..... كل من يبي ينضم ليه يضمه يحمي الشعب و وطنا و بتروله ..... موش جيش حاكم ننسقوا من سمه لا جيش مجموعات ليها صوله ..... على خلاف ترقى بينها للقمه نبوا كتم صوت الفتن ما نصغوله ..... و نحطوا على كمين صدع مرمّه نبوا الجريح يطيب و نصبوله ..... و فقد الشهيد نهونوه على امه نبوا المواطن يرتفع مدخوله ..... و هو مالعرق مبلول يبقى كمه نبوا شعب واعي ينتمي لاصوله ..... يحايي وطن زلزال موحش عمه و يلتف حول حكومته ببطوله ..... يساعد عساها تنجح المهمه بر الامان بوطنا نصلوله ..... و نديروا انتخابات عرس و لمه ماعاد تلزمنا القصه لولى ..... متاع الصفيق و يا زعيم الامه هزمناه حي بقوته و اسطوله ..... حرام عاد يهزمنا و قبره غمه

رد الشاعر الانيق توفيق قادربوه وسلوى الدوكالى على قصيدة نعيم الزوى هما هما نفس الوجوه اللى تجيب الغمه كيف امس كيف اليوم يقول توفيق قادربوه ما هم هما اللي لجلهم ضحى الشهيد بدمه وفــــــارق الدنيا هـــــان باته وأمه ونعقــــوا علي قبــره وداع الهمه يا سارقين يا سخـــــــف تابع دوم للطاغيين يا رمم يا أســــوا الليبيين جلباب وطنا ليش تقطعو في كمه بكرا لنا وبكرا الحكاوي إساع يحكن عنا وبكرا التخلص من دعــــاة الغنه وبكرا الشمــس تبان بعد الغمه رد الشاعره سلوى الدوكالى هما هما....نفس الوجوه اللي اتجيب الغمه...عليك ماتغير شئ يالقــــــاقة......ياداعمين الظلم ياســــراقة عدوا خلاص اليوم طاح ارواقه....الوجه الشنيع اللي نزح من دمه بانن نواياكم بكـــل صفــاقه....اتشيب اللي مازال في بطن امه وبعقولكم هالتافهه المعـــاقه....ووجودكم مرفوض شينك رمه وحق من خلقنا اليوم يانعاقه....وراكم لعند الوطن يجلى همه حلوا عنــــا....بلاكم اليوم الوطن يبقى جنه ووجودكم لافرض لاهو سنه....قوي ظلمكم قتال ماكن سمه ظلمتوا الزوي اليوم واحد منه....قال كلمته والحبر كان بدمه عليك بودعه ياناس شينك غنه....قتلوا القتيل وجو ايعزوا فامه والشعب انتفض ماعاد ترجوا حنه....وزم زومه ثلب طيبك زمه وهما هما...

رد الشاعر المتألق بلقاسم السحاتى على قصيدة نعيم الزوى هما هما !!! نفس الوجوه اللى اتجيب الغمه ... كيف امس كيف اليوم :: :: يقول الشاعر بلقاسم السحاتى نفـــس الهــــم .... ونفــس الوجــــوه اليــوم همــا هـــم ونفـــس الاوضـــاع اللــى علــيها تــم الثـــورة وكــم شـــهيد ثكـــلى امـــه كــــل حــــــد جــــايب اولاد العـــــــم يريــــد مـــنصبه مــاعــاد شــى يهمه اباحـــــو الســـرقه والاعـــــراض ودم كـــيف مــن مــربى لفعتــه فى كمــه لا لارض ســلمــت لا الشــعب اســلم ســاهل القتـــل اليـــوم كنـــه تـــمه؟؟ اتجيــــك الشمــاته لــو الظـــلم يعـــم وطابـــور خامـــس تـــو ينــــفث سـمه هما هما

مشاركة (الشاعر النجم) رجب الشيخي: نـــفـــس الـــحـــــالــــه ونــفــس الــكـلام ومــنــتــهــى الــرزالــه ونــفــس الــوجــوه الــكـــاذبــه الــقــوالـه لـلـطــاغــيــه تــســلـــم زعــيـــم الامــه يـــامـــا تـــنــادوا بــيــه هــو واعـــيـــالــه واطــي وهـــم خـلــوه فــــوق الــقــمــه والـــيــوم قـــنــط كــل حـــد احـــبـــالـــه يــجـري ورا مــنــصــب بــعــزم وهــمـــه والـكـايـنـه اللـي ايـريــد مـنـصـب طــالــه جــا بـالـلــقــاقــه الــجــاريـــه فـي دمـــه وايــرد كــي لــــول ايـــــــام ضــــــلالـــه مــا ايـفـيـد غـيـر جــاره اولــد بـن عـمــه وكـلا الــبـــاقـي شــالــهــم مـن بــالـــه اتــــقـــول ورث جـــا مـن بـــوه ولا امـــه واكــبـر دلــيــل خــونــا نـعــيـم وحــالــه قــال شـعــر عــنـده حـق (هـمـا هـمـا) ضــروه ويـن نــاصـــر الــحــق وقـــالـــه لاجـــل كــــلام الـحــق يــوجـــع تـــمــا الــمــفــروض ثـــورتــنــــا اديــر إزالــــه لاشــخــاص واجــد بـايـعـيـن الـــذمـــه وخــويــا نــعــيــم انــدزلــه رســـالــــه ويـاخــذ كـلامـي لـو كــلامـي ايـهـمــه نـــبــيــه نــا ايــوكـــل الله تـــعـــالــــى وصـيـور ربـي ايــزيــح عــنــه هــمــــه يـمـهـل ومــا يـهـمــل الله بـافــعــالـــه ومـنـه الــفــرج بـالـصـبـر تـو ايــتــمــه وكـلــمــه اخــيــره انـقــولـهــا بـدلالـه نــعـيـم فـيـمــا قــال يـسـلــم فــمــه

تنظيم محمد الملوي